Святому Царю Страстотерпцу Николаю II

(Царь-мученик Николай – небесный предстатель за Россию, молитвенник за русский народ, помощник в различных семейных нуждах)

Молитва 1

О, святы́й страстоте́рпче царю́ му́чениче Нико́лае, Пома́заника Своего́ тя Госпо́дь избра́, во е́же ми́лостивно и пра́во суди́ти лю́дем твои́м и храни́телю ца́рства правосла́внаго бы́ти. Ца́рское служе́ние сие́ и о душа́х попече́ние со стра́хом Бо́жиим соверши́л еси́. Испыту́я же тя, я́ко зла́то в горни́ле, ско́рби го́рькия Госпо́дь ти попусти́, я́коже Ио́ву многострада́льному последи́ же престо́ла ца́рскаго лише́ние и му́ченическую смерть посла́ ти. Вся сия́ кро́тко претерпе́вый, я́ко и́стинный раб Христо́в, наслажда́ешися ны́не ве́шния сла́вы у престо́ла всех Царя́, ку́пно со святы́ми му́ченики: свято́ю цари́цею Алекса́ндрою, святы́м о́троком царе́вичем Алекси́ем, царе́внами Ольгою, Татиа́ною, Мари́ею и Анастаси́ею и с ве́рными слу́ги твои́ми, та́кже со свято́й му́ченицею княги́нею Елисаве́тою и со все́ми ца́рственными му́ченики и свято́ю му́ченицею Варва́рою. Но я́ко име́я дерзнове́ние ве́лие у Христа́ Царя́, Его́ же ра́ди вси пострада́ша, моли́ с ни́ми, да отпу́стит Госпо́дь грех наро́да, не возбрани́вшаго убие́ние твое́, царя́ и Пома́занника Бо́жия, да изба́вит Госпо́дь стра́ждущую страну́ Росси́йскую от лю́тых безбо́жник, за грехи́ на́ша и отступле́ние от Бо́га попу́щенных, и возста́вит престо́л правосла́вных царе́й, нам же пода́ст грехо́в проще́ние, и на вся́кую доброде́тель наста́вит нас, да стяжи́м смире́ние, кро́тость и любо́вь, я́же сии́ му́ченицы яви́ша, да сподо́бимся Небе́снаго Ца́рствия, иде́же ку́пно с тобо́ю и все́ми святы́ми новому́ченики и испове́дники Росси́йскими просла́вим Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.