Святому праведному Але́ксию Мечёву

Молитва 1-я

К тебе́, о пра́ведный о́тче Але́ксие, мы, гре́шнии и недосто́инии, притека́ем и со умиле́нием взыва́ем ти: при́зри ны́не ми́лостивно с высоты́ святы́я своея́ на Оте́чество на́ше и нас, тя прославля́ющих. Прия́вший в житии́ свое́м тя́готы люде́й и се́рдцем, ми́лующим понесы́й ско́рби их, приими́ в моли́твенное твое́ предста́тельство и нас, грехи́ мно́гими обремене́нных и суето́ю ми́ра сего́ утружде́нных. В тебе́, о ди́вный ста́рче, просла́вися Госпо́дь, яви́в тя таи́нником ми́лости Бо́жией. Тя призыва́ем неотсту́пно: бу́ди врач ду́шам и телесе́м на́шим, уныва́ющим - утеши́тель, малоду́шным дерзнове́ние низпосли́, помраче́нных зло́бою всепроще́нию научи́, воздержа́нию спосо́бствуй. Воспламени́, благи́й делателю́ виногра́да Христо́ва, хла́дные сердца́ на́ша ре́вностию служе́ния твоего́, научи́ моли́тве непреста́нной и де́ятельной любве́ с утесне́нием себе́ ра́ди бла́га бли́жних на́ших. Укрепи́ моли́твами твои́ми ча́да Це́ркви на́шея, да поживе́м в любве́ и ми́ре, а вне огра́ды церко́вныя пребыва́ющии да уразуме́ют Христо́ву Истину и вку́пе с на́ми просла́вят Животворя́щую и Неразде́льную Тро́ицу и твое́ ми́лостивное предста́тельство во ве́ки веко́в. Ами́нь.

Молитва 2-я

О, всечестны́й и преблаже́нный о́тче наш Але́ксие, ди́вный ста́рче Моско́вский и всея́ Це́ркви Росси́йския похвало́ и ра́дование! Ве́лию любо́вь ко Го́споду име́я, заве́ты ева́нгельския непрело́жно исполня́я, ду́шу твою́ за па́ству полага́л еси́, миле́ющим се́рдцем боле́знуя о всех, прося́щих твоея́ по́мощи. Приими́ ма́лое: сие́ моле́ние на́ше, и я́ко в земно́м житии́ твое́м отира́л еси́ вся́ку слезу́, облегча́л еси́ вся́ку скорбь, так и ны́не милосе́рдый моли́твенниче и хода́таю наш, возьми́ тя́готы, боле́зни и ско́рби на́ша, испо́лни стра́ждущая сердца́ ра́достию, умоли́ человеколю́бца Бо́га о проще́нии безчи́сленных прегреше́ний на́ших, да очи́стив ду́шу покая́нием, к де́ланию до́брому присту́пим. Ей, ста́рче благи́й, бу́ди и нам па́стырем до́брым, наставля́я на стезю́ спасе́ния, да моли́твами твои́ми безпоро́чно про́йдем путь жития́ на́шего и обря́щем Оте́чество Небе́сное, иде́же ты со а́нгелы и все́ми святы́ми предстои́ши Престо́лу Святы́я Тро́ицы, сла́вяще Безнача́льного Отца́ со Единоро́дным Его́ Сы́ном и Пресвяты́м, и Благи́м, и Животворя́щим Его́ Ду́хом во ве́ки веко́в. Ами́нь.